哈哈，當然唔係真係好平，我亦冇玩哂成個歐洲，只係去左兩個國家，發現去歐洲玩，原來都可以平易近人。
想睇，不過我都會夾硬迫你睇架啦
唔知朋友仔想唔想上鏡，所以還是打格仔^^
當晚可以話感動非常，真係唔該哂我老公，清唱一首彭羚的 "小玩意"
「我用無限濃情蜜意
來造迷人玩意
還在沒名份手指
感覺多麼似
加冕光圈變天使
我用無限濃情蜜意
來造迷人玩意
才明白原來在意
一世穿一次小玩意
是我畢生大志」
仲幫我整喊埋成班姊妹，宜家諗返都覺得好搞笑，新娘 + 伴娘 + 所有姊妹一齊喊，可以話係
"何其壯觀"。
結婚當晚後第 2
日，我地就準備我地既歐洲之旅，從未衝出亞洲既我，真係好興奮!!!
整個歐遊之旅全程自遊行，自己 book 機票、酒店、火車証，原來都好有滿足感!
蜜月行程一共 11
日，時間其實一啲都唔充裕，不過老公的地盤要趕工，11日...點都去左先算，但扣返搭飛機的時間，實情得 9 - 10 日。
今次我地會去兩個地方 - 瑞士 和 巴黎
第一站 - 瑞士
我地先飛去瑞士蘇黎世 ZURICH，今次選乘 阿聯酋 EMIRATES 的航班，唔好以為
EMIRATES 就唔好，其實真係又舒服又抵搭 [要係杜拜轉機]
每個坐位都有獨立電視，仲有埋 三腳插蘇
比你叉電，可能好多人聽到都驚呢D阿拉伯公司的飛機上面會有陣味，可以話你知.....我來回一共四程機都聞唔到，飛機又大又新!!!
圖中空姐仲會主動派公仔比小朋友~~
呢程機由香港飛往杜拜，大約要搭 9 小時，當然食飽飽先訓可以訓得 "林"
D啦，係等空姐派餐之際，我就係個位度八卦一下，比我搵到一個貼紙
哈，又幾體貼喎，不過...班空姐們點樣先睇到呢
原來貼係張椅的頂部位置就掂架啦
之後比我發現左個 MENU ，即係睇下有咩食先
零晨先上機，當然唔會食咁 HEAVY 既野 ~ 所以都係 3文治 同 果汁
食過宵夜，我就訓教啦~ 大約訓左 5-6 個鐘，空姐們又再派餐，今次係食大餐啦
食完想再訓，不過真係好辛苦，屈住左6-7個鐘，又唔可以成日出出入入，對腳真係痺哂，好彩我唔係搭直航機，挨多個零兩個鐘就可以落地行下，直航要搭十幾個鐘
@_@
2個鐘之後就到達杜拜，真係好多人工島，機場一望無際
D屋好整齊，亦都見到佢地真係冇乜綠化，始終都係沙漠地方
係杜拜一落機，就可以即時去轉機，唔點洗等
今程由杜拜飛去蘇黎世，冇記錯要搭好似 5-6 個鐘，又係例牌上機食野
除左圓形果個飽好硬之外，其餘全部都好好食!!!
飛機餐有幾何好食，但佢又的確唔錯，抵讚!!
食完，睇完套戲又恰一陣
見到一大遍雪地呀!!!
飛機準備降落蘇黎世機場啦
大部分都係瑞航的飛機，不過直航比較辛苦同埋價錢比 EMIRATES 貴一倍!!!
我都係留返D錢黎買野好過
落機後就搭無人駕駛去離境大樓過關
手震添
↑ 蘇黎世機場
整個瑞士旅程，我地都會以 SWISS PASS 作交通費，要 ACTIVATE 個 SWISS
PASS，就首先去到機場的火車櫃位，比佢蓋個日期印就得架啦
首先，我地會係機場搭火車去第一晚目的地 ZERMATT 策馬特
14:40 蘇黎世機場站的 4 號月台 搭 IC828，17:02 到達 VISP 站的6 或 7
號月台
再以 8 分鐘時間跑去 3 號月台 轉另一班 17:10 開出的 火車 R253
，18:14分就會到第一晚的落腳地 ZERMATT !! 非常清楚，班次超準時!!
顯示板點樣睇呢?? 宜家教你~ 搵返自己搭果班車既時間
14:40 IC 車 [INTERCITY 只停大站] 由 ZURICH HB 開出，途經
BERN, THUN, SPIEZ, VISP ，終點站為 BRIG
去到月台都會有指示牌既，右上角 SEKTOR 就代表 車卡，下面細細個 1 字代表係 頭等位，2
字就次等位，咁宜家即係表示 頭等位就係 車卡 B & C ，次等位就係 車卡 C &
D，而中間呢個好似交叉咁既符號呢，其實就係刀叉黎既，代表餐車的位置。
大家可能會對 ZERMATT
呢個目的地好陌生，不過當地的地標你一定見過，就係瑞士三角朱古力上面的商標 - 馬特洪峰 MATTERHORN
呢程係我成個TRIP入面，最長途的一程，大家睇上面個 MAP
都知道真係幾遠下。
唔好理咁多啦~ 出發!
途經一個唔知咩火車站，超多火車軌。瑞士以火車為主要交通工具，我地張 SWISS PASS
就可以係指定日期內乘搭任何班次的火車。
沿途真係風光如畫，不過始終咁左咁耐飛機，身體已經好....好....好攰，影影下已經眼訓，去到
ZERMATT 個天已經黑哂!!
ZERMATT 係海拔 1620公尺的 MATTERHORN
山上面，係一個環保小鎮，環保到小鎮入面係冇電油車，只有馬車和電動車，絕對唔會有空氣污染。
放低左行李就出去搵野食，超凍呀，我包到成隻稯咁
本身係 ZURICH 的氣溫都仲有 5 - 6 度，宜家上到黎 ZERMATT 得返 - 5
、-6度，以我呢D係香港生活慣的人，一時間凍左咁多度，真係好唔慣，凍到我呆左! 又凍又餓真係好辛苦呀~
好彩比我地搵到間 PIZZA 店未關門，唔理三七廿一，衝入去~~~~
點左個 HAWAII PIZZA 2條友食 ~ 好似 15蚊瑞士法朗 ，約
120-130港紙
PIZZA店入面有暖氣，個人即時醒返少少
店主整好 PIZZA
之後，我地就飛奔返酒店，冇錯，我冇形容錯，的確我地係拎住個PIZZA跑返去，因為我地驚個 PIZZA 係零下的低溫變左凍餅，所以就跑返去。
我地返到酒店，係溫暖的房間入面食住一個溫暖的PIZZA，真係舒服哂。食完，拿拿臨沖涼訓覺，因為我地聽朝要一早起身等日出!
點解要等日出?! 下回分解
沒有留言:
發佈留言